Түркістан мен Ташкент облыстары жаңа экономикалық бағыттарды талқылады

Өзбекстан Республикасына жұмыс сапары аясында Түркістан облысының әкімі Нұралхан Көшеров Ташкент облысының хокимі Зойир Мирзаевпен бірге өңірдегі стратегиялық маңызы бар бірқатар өндірістік және туристік нысандарды аралап, өнеркәсіп, жоғары технологиялар, шикізатты терең өңдеу және туризм салаларындағы озық тәжірибелермен танысты.

Сапар барысында тараптар екі өңірдің әлеуметтік-экономикалық даму үрдістерін, инвестициялық ахуалды жақсарту және өнеркәсіптік кооперацияны күшейту бағыттарын талқылады. Соңғы жылдары Түркістан облысында индустриялық аймақтарды дамыту, жаңа өндіріс орындарын ашу, шағын және орта бизнесті қолдау, сондай-ақ туризм инфрақұрылымын кеңейту бағытында жүйелі жұмыстар жүргізіліп келеді. Бұл өз кезегінде өңір экономикасының әртараптануына және халықтың жұмыспен қамтылуына оң әсерін тигізуде.

Делегация табиғи ландшафтта орналасқан туристік кешенде өңірдің рекреациялық әлеуетін тиімді пайдалану тәжірибесімен танысты. Кешенде заманауи туристік инфрақұрылым қалыптастыру, экотуризмді дамыту және келушілерге қолайлы жағдай жасау бағыттары қарастырылған.

Бұдан кейін қонақтар Алмалық қаласындағы мыс байыту фабрикасына барып, минералдық ресурстарды терең өңдеу және өндірістік тиімділікті арттыруға бағытталған жаңғырту бағдарламасымен танысты. Бұл кәсіпорын елдің экспорттық әлеуетін күшейтуге және өнеркәсіптік өндірістің қосылған құнын арттыруға ықпал ететін маңызды нысандардың бірі ретінде атап өтілді.

Ахангарон ауданында делегация климаттық техника өндіруге маманданған бірлескен кәсіпорынның қызметімен танысты. Кәсіпорында өндірістік қуаттылықты арттырумен қатар, халықаралық стандарттарға сай сапа менеджменті жүйелері енгізілген.

Сондай-ақ электротехника саласындағы ірі өндірістік кластерлердің бірі саналатын өнеркәсіптік технопарк қызметіне ерекше назар аударылды. Мұнда өндірісті жергіліктендіру, сирек кездесетін металдарды өңдеу және жоғары технологиялық өнім шығару бағыттары дамып келеді. Сонымен қатар жартылай өткізгіш технологиялар саласындағы жоба таныстырылып, микропроцессорлық чиптер мен электронды модульдер өндіру мүмкіндіктері көрсетілді.

Сапар қорытындысында Түркістан облысының әкімі Өзбекстандағы өнеркәсіптік инфрақұрылымның қарқынды дамуын, инвестициялық жобалардың жүйелі жүзеге асырылуын және инновациялық технологиялардың өндіріс саласына кеңінен енгізілуін атап өтті. Бұл факторлар өңірдің экономикалық тұрақтылығын арттырып, халықаралық бәсекеге қабілеттілігін күшейтуге ықпал ететіні айтылды.

Кездесулер барысында тараптар өңіраралық ынтымақтастықты одан әрі кеңейту, сауда-экономикалық байланыстарды нығайту, бірлескен инвестициялық жобаларды іске асыру, сондай-ақ өнеркәсіп, туризм және инновациялық даму салаларындағы үздік тәжірибелермен алмасу мәселелерін қарастырды.

Жалпы алғанда, жұмыс сапары екі елдің бауырлас өңірлері арасындағы стратегиялық әріптестікті нығайтуға, экономикалық интеграцияны тереңдетуге және әлеуметтік-экономикалық дамудың жаңа мүмкіндіктерін ашуға бағытталған маңызды қадам болды.