ТҮРКІСТАН: САУРАНДА МАЛ БОРДАҚЫЛАУ АЛАҢЫНЫҢ ҚҰРЫЛЫСЫ ҚАРҚЫНДЫ

Түркістан облысы, Сауран ауданына қарасты Үшқайық ауылдық округіне мал бордақылау алаңының құрылыс жұмыстары қарқынды жүргізілуде. Аталған жоба агроөнеркәсіптік кешенді дамытуға, ет өндірісінің көлемін арттыруға және ауыл тұрғындарын тұрақты жұмыспен қамтуға бағытталған. Қазіргі таңда нысанда негізгі құрылыс жұмыстары жүргізілуде.

Жобаға сәйкес, мал бордақылау алаңының жалпы аумағы 9,7 гектарды құрайды. Оның аясында 14 өндірістік және қосалқы нысан салу жоспарланған. Инвестиция көлемі 1,1 млрд теңгені құрайды. Жоба толық іске қосылған кезде 42 жаңа жұмыс орны ашылады.

Аудан әкімі Мақсат Таңғатаров құрылыс алаңын аралау барысында мердігер мекеме өкілдеріне жұмыстардың сапалы әрі белгіленген мерзімде аяқталуын қамтамасыз ету жөнінде нақты тапсырмалар берді. Сондай-ақ инвестициялық жобаларды қолдау, ауыл шаруашылығы өндірісін дамыту және аудан экономикасының өсімін қамтамасыз ету бағытындағы жұмыстардың жүйелі түрде жалғасатынын атап өтті.

Аталған жоба өңір экономикасына тікелей серпін береді. Ең алдымен, жаңа жұмыс орындарының ашылуы халықтың табысын арттырып, жұмыссыздық деңгейін төмендетуге ықпал етеді. Екіншіден, ет өндірісінің көлемі ұлғайып, ішкі нарықтың азық-түлік қауіпсіздігі күшейеді. Сонымен қатар, ауыл шаруашылығына тартылған инвестиция жергілікті инфрақұрылымның дамуына және кәсіпкерліктің жандануына жол ашады. Жалпы алғанда, мұндай жобалар Түркістан облысының агроөнеркәсіптік кешенін күшейтіп, өңірдің әлеуметтік-экономикалық тұрақты өсуіне негіз болады.