Түркістан: Тұрғындардың мәселесі заң аясында шешіледі

Қоғамдағы тыныштық пен тұрақтылықтың кепілі – заң мен тәртіптің сақталуы. Әрбір азаматтың құқықтық сауатты болуы, заңға құрметпен қарауы – әділетті әрі қауіпсіз орта қалыптастырудың басты алғышарты. Заң – мемлекеттің негізгі тірегі. Ол барша азаматтың құқықтары мен бостандықтарын қорғауға, қоғамда әділеттілік орнатуға бағытталған. Ал тәртіп – осы заңның нақты орындалуын қамтамасыз ететін тетік. Егер қоғамда заң үстемдігі болмаса, онда бейберекетсіздік, өзара сенімсіздік пен тұрақсыздық жайлайды.

Бүгінде құқық қорғау органдары мен мемлекеттік мекемелер халықпен ашық жұмыс істеуге, әрбір азаматтың мәселесіне құлақ түріп, әділ шешім шығаруға ұмтылуда. Бұл – Мемлекет басшысы Қасым-Жомарт Тоқаевтың «Халық үніне құлақ асатын мемлекет» тұжырымдамасының нақты көрінісі.

Заң мен тәртіп – тек жазалау құралы емес, бұл – қоғамға бағыт-бағдар беретін, әр азаматтың құқықтарын қорғайтын әділеттілік өлшемі. Сондықтан, заң талаптарын орындау, қоғамдық тәртіпті сақтау – әрбір азаматтың жауапкершілігі. Осы мақсатта Түркістан облысындағы  «Ашық әкімдік» кеңсесінде өңір тұрғындарын жеке қабылдау бекітілген кестеге сәйкес жүргізіліп келеді. Бұл жолы азаматтарды облыс әкімінің орынбасары Ертай Алтаев өзі жетекшілік ететін салалар бойынша тұрғындарды жеке қабылдап, мәселелерін тыңдады.