Түркістан облысында 7 мәдениет нысаны биыл аяқталады

Түркістан облысында мәдениет саласы 6 негізгі бағыт бойынша халыққа қызмет көрсетуде. Олар – театр, концерттік ұйымдар, музей, кітапхана, тарихи-мәдени мұралар және тілдерді дамыту мен ономастика. Аталған бағыттарда облыстық мәдениет басқармасына қарасты 24 мәдениет мекемесі жұмыс істейді.

Облыс әкімі аппаратының апталық мәжілісінде осы мәдени мекемелердің қызметін жандандыру, олардың әлеуетін арттыру мәселесі кеңінен талқыланды. Түркістан облысының әкімі Нұралхан Көшеров сала басшыларына нақты тапсырмалар беріп, мәдениет пен руханият – өңірдің әлеуметтік-экономикалық дамуына тікелей әсер ететін маңызды салалар екенін атап өтті.

Сонымен қатар мәдениетімізді дамыту үшін жүйелі кемшіліктерді уақытында анықтап, нақты шешім қабылдаумыз керектігін айтып,  облыс көлемінде өтетін іс-шаралардың концепциясын қайта қарап, креативті идеяларды пайдалана отырып, ұсыныс енгізу қажеттігін жеткізді.

– Түркістан – тарихи-мәдени мұраларға бай өңір. Бұл саладағы жұмыс формалды емес, сапалы әрі нәтижелі болуы тиіс. Әсіресе, мәдени іс-шаралардың мазмұны, жастардың қатысуы мен тарихи сана қалыптастыру бағытына мән берілуі қажет, – деді облыс басшысы.

Облыстық мәдениет басқармасының басшысы Әзімхан Қойлыбаевтың айтуынша, өңірдегі үш театрда биылғы 9 айда 15 жаңа спектакль сахналанып, ағымдағы 245 спектакль қойылып, 35 мың көрермен қамтылды. Жыл соңына дейін театрларда тағы 15 жаңа қойылым көрермен назарына ұсынылады. Түркістан облысында Ш.Қалдаяқов атындағы облыстық филармония мен «Конгресс холл» көп салалы кешені қызмет көрсетіп келеді. Екі концерттік ұйымда биыл 145 концерт және мәдени іс-шаралар өткізіліп, 85 500 көрермен қамтылды.

Түркістан облысында мәдениет саласының дамуы қарқын алуда. Музей, кітапхана, мәдени нысандар мен шығармашылық үйірмелер бағытында айтарлықтай жетістіктерге қол жеткізілген.

-Облыстағы 24 музейде 2025 жылдың 9 айында 552 көрме, 5983 экскурсия, 482 көпшілік іс-шара ұйымдастырылды. Музейге келушілер саны 205 178 адамды құрап, 2024 жылғы 9 аймен салыстырғанда 5%-ға артып отыр. Биыл музейлерде 2167 жәдігер жинақталып, жалпы жәдігер саны 178 134-ке жетті. Қазіргі уақытта облыста 388 кітапхана халыққа қызмет көрсетеді. 9 айда 9987 көпшілік іс-шара ұйымдастырылып, 23985 дана жаңа кітаппен толықтырылды. Жалпы кітап қоры 6 054 726 данаға жетіп отыр. Кітапханадағы оқырмандар саны 351 096 адамды құрап, 2024 жылғы 9 аймен салыстырғанда 2,5%-ға артқан. Облыс бойынша биыл «Ауыл – Ел бесігі» бағдарламасы аясында 7 мәдениет нысанында (Бәйдібек – 1, Мақтаарал – 2, Түлкібас – 1, Сауран – 1, Кентау – 1, Төлеби – 1) құрылыс жұмыстары жүріп жатыр, жыл соңына дейін аяқтау жоспарлануда. Сонымен қатар биыл 9 нысанның (Сауран – 1, Түлкібас – 2, Сарыағаш – 3, Келес – 1, Ордабасы – 1, Жетісай – 1) құрылыс жұмыстарына қаржы бөлініп, 2026 жылы пайдалануға беру көзделіп отыр. Жергілікті бюджет есебінен Түркістан қаласындағы 500 орындық мәдениет үйі пайдалануға берілді, – деді Әзімхан Қойлыбаев.

Айта кетсек, қазіргі таңда, «Artsport.kz» ақпараттық жүйесі арқылы облыс аумағында 221 өнім беруші арқылы 676 үйірмеде 18 575 бала тегін шығармашылық үйірмелерге қатысуда. Бұл бағыттағы жұмыстар тұрақты бақылауға алынды.